Seg irebbi-m a taddart i cleqfen arrac!

Amek ara yeqbel weqbayli ass-a, ad thudd taddart-is? Amek ara igen weqbayli ass-a mi ara iẓer ula d arrac ttwakaren?

Gar tmest akked tayeḍ arrac ttwacleqfen si tudrin; ur d-yegri laman deg wat taddart, ur telli talwit, ur yelli wurar, ur yelli berra. Berra, tajmaɛt tuɣal amzun d tiẓgi, win yeffɣen ɣer-s wis ma d-yuɣal. Amek ara nessusem?

Amek ara nessusem mi ara nwali, iḍelli di tudrin d laman i iḥekmen; tiwura n yixammen brarḥent deg yiḍ deg wass, ass-a ɣas medlent laman ur yelli.

Tamurt-nneɣ tnegger nekkni nettwali d acu i d-yenna Uyeḥya fell-aɣ! Tamurt-nneɣ tquc nekkni nettwali Ḥennaci ma mazal-it di JSK. Tamurt-nneɣ tekfa nekkni nettmuqul ipuciḍen iberkanen! Amek ara d-yas yiḍes aqbayli n wass-a yesɛa cwiṭ n sswab?

Amek ara neqbel ijadarmiyen-nni yenɣan tarwa-nneɣ iḍelli, ad ɛassen fell-aɣ ass-a, ad d-afen aqcic neɣ taqcict yettwakren seg irebbi n taddart? Amek?!

Ma yella d tidet neḥmmel talwit, nebɣa tudert ad nebru i udabu akked yiḍan-is, ad ncemmer iɣallen-nneɣ, ala nekkni i izemren ad nerr ɣef tudrin, ala nekkni i izemren ad d-nsers laman di tudrin.

Irnaten Murad